khuli jab aankh to dekha ki duniya sar pe rakkhi hai

khulī jab aañkh to dekhā ki duniyā sar pe rakkhī hai

ḳhumār-e-hosh meñ samjhe the ham Thokar pe rakkhī hai

ta.āruf ke tale pahchān ġhā.eb ho ga.ī apnī

ajab jaadū kī Topī ham ne apne sar pe rakkhī hai

mire hone kā ye tasdīq-nāma kis ne likkhā hai

gavāhī kis kī merī zaat ke mahzar pe rakkhī hai

achānak gar vo be-āmad hī kamre meñ barāmad ho

tavajjoh ham ne to markūz bām-o-dar pe rakkhī hai

ajab collage hai qismat kā mahrūmī kā mehnat kā

sitāre chhat pe rakkhe haiñ thakan bistar pe rakkhī hai

matā-e-haq-aqīda ek sajde meñ churā laayā

ḳhirad juuyā thī kis dahlīz par kis dar pe rakkhī hai

nahīñ qaul-o-qarār-e-jān-o-dil kaafī na the us ko

qasam us shoḳh ne āḳhir hamāre sar pe rakkhī hai

hisāb-e-nek-o-bad jo bhī ho ham itnā samajhte haiñ

binā-e-hashr dard-e-dil pe chashm-e-tar pe rakkhī hai

khuli jab aankh to dekha ki duniya sar pe rakkhi hai

KHumar-e-hosh mein samjhe the hum Thokar pe rakkhi hai

taaruf ke tale pahchan ghaeb ho gai apni

ajab jadu ki Topi hum ne apne sar pe rakkhi hai

mere hone ka ye tasdiq-nama kis ne likkha hai

gawahi kis ki meri zat ke mahzar pe rakkhi hai

achanak gar wo be-amad hi kamre mein baramad ho

tawajjoh hum ne to markuz baam-o-dar pe rakkhi hai

ajab collage hai qismat ka mahrumi ka mehnat ka

sitare chhat pe rakkhe hain thakan bistar pe rakkhi hai

mata-e-haq-aqida ek sajde mein chura laya

KHirad juya thi kis dahliz par kis dar pe rakkhi hai

nahin qaul-o-qarar-e-jaan-o-dil kafi na the us ko

qasam us shoKH ne aaKHir hamare sar pe rakkhi hai

hisab-e-nek-o-bad jo bhi ho hum itna samajhte hain

bina-e-hashr dard-e-dil pe chashm-e-tar pe rakkhi hai