KHulq se dur raha jo wo misali na hua

ḳhulq se duur rahā jo vo misālī na huā

us ko hāsil kabhī e'zāz zarā bhī na huā

na.ī tahzīb kā parvarda nigār-e-bebāk

bā-hayāoñ meñ kabhī shān-e-tajallī na huā

us ke kirdār kī nafrat pe rakhī hai buniyād

pyār-āmāda ba.īñ-vajh vo af’ī na huā

husn parde meñ rahā jitnā huā jān-e-nazar

ho ke be-parda koī husn haqīqī na huā

'ijz kī raah se haTnā mirī fitrat hī na thī

lab se yuuñ mere adā harf-e-ta’allī na huā

sab kā anjām bahar-hāl yahī hotā hai

kyā pas-e-marg har ik aadmī miTTī na huā

us kī fitrat ko milī nafs kī ġhairat 'abrār'

dast-e-ḳhuddār kabhī dast-e-savālī na huā

KHulq se dur raha jo wo misali na hua

us ko hasil kabhi e'zaz zara bhi na hua

nai tahzib ka parwarda nigar-e-bebak

ba-hayaon mein kabhi shan-e-tajalli na hua

us ke kirdar ki nafrat pe rakhi hai buniyaad

pyar-amada bain-wajh wo af’i na hua

husn parde mein raha jitna hua jaan-e-nazar

ho ke be-parda koi husn haqiqi na hua

'ijz ki rah se haTna meri fitrat hi na thi

lab se yun mere ada harf-e-ta’alli na hua

sab ka anjam bahar-haal yahi hota hai

kya pas-e-marg har ek aadmi miTTi na hua

us ki fitrat ko mili nafs ki ghairat 'abrar'

dast-e-KHuddar kabhi dast-e-sawali na hua