khulta hai kisi par to kisi par nahin khulta

khultā hai kisī par to kisī par nahīñ khultā

ham-rāz 'ajab hai ki hamī par nahīñ khultā

tum saath ho mere ki mire saath nahīñ ho

ye kaisā izāfa hai kamī par nahīñ khultā

ik aah bhī hotī hai pas-e-zabt-o-pas-e-lab

ḳhāmosh paḌe rahnā sabhī par nahīñ khultā

hone kā gumāñ hai ki na hone kā yaqīñ hai

auroñ pe to khultā hai mujhī par nahīñ khultā

girye kī suhūlat jo khulī hai to khulā hai

ġham kis pe khule vo jo ġhamī par nahīñ khultā

khulne kī kahānī kā dar-o-bast bhī az-ḳhud

jo phuul pe khultā hai kalī par nahīñ khultā

sarmastī-o-sarshārī-o-sar-afrāzī khule kyā

jab mere taḳhayyul kā koī par nahīñ khultā

khulta hai kisi par to kisi par nahin khulta

ham-raaz 'ajab hai ki hami par nahin khulta

tum sath ho mere ki mere sath nahin ho

ye kaisa izafa hai kami par nahin khulta

ek aah bhi hoti hai pas-e-zabt-o-pas-e-lab

KHamosh paDe rahna sabhi par nahin khulta

hone ka guman hai ki na hone ka yaqin hai

auron pe to khulta hai mujhi par nahin khulta

girye ki suhulat jo khuli hai to khula hai

gham kis pe khule wo jo ghami par nahin khulta

khulne ki kahani ka dar-o-bast bhi az-KHud

jo phul pe khulta hai kali par nahin khulta

sarmasti-o-sarshaari-o-sar-afraazi khule kya

jab mere taKHayyul ka koi par nahin khulta