khulti hai guftugu se girah pech-o-tab ki

khultī hai guftugū se girah pech-o-tāb kī

par kis se khul ke baat kareñ iztirāb kī

kaafī nahīñ hai chashm-e-tamāshā ko rañg-e-gul

laa.eñ kahāñ se zaḳhm meñ ḳhushbū gulāb kī

apnī barahnagī ko bachā tez dhuup se

kirnoñ meñ bū hai jalte hue āftāb kī

kuchh maiñ shajar se TuuT ke be-ḳhānumāñ huā

haañ kuchh havā ne bhī mirī miTTī ḳharāb kī

ik umr ho ga.ī hai ki maiñ jāñkanī meñ huuñ

aisī Thahar ga.ī hai ye saa.at azaab kī

ehsās-e-tīrgī hai to sūraj uchhāl de

varna duā na maañg yahāñ inqilāb kī

mahkūm bastiyoñ se sarakne lagī hai dhuup

vo ahd huuñ ki jis ne shafaq be-naqāb kī

bijlī chalī ga.ī to vo āñkhoñ meñ rah gayā

ab chhū ke paḌh rahā huuñ ibārat kitāb kī

'shāhid' kahāñ se ho ke guzartī hai āb-jū

rañgat tamām surḳh hai kyuuñ sat.h-e-āb kī

khulti hai guftugu se girah pech-o-tab ki

par kis se khul ke baat karen iztirab ki

kafi nahin hai chashm-e-tamasha ko rang-e-gul

laen kahan se zaKHm mein KHushbu gulab ki

apni barahnagi ko bacha tez dhup se

kirnon mein bu hai jalte hue aaftab ki

kuchh main shajar se TuT ke be-KHanuman hua

han kuchh hawa ne bhi meri miTTi KHarab ki

ek umr ho gai hai ki main jaankani mein hun

aisi Thahar gai hai ye saat azab ki

ehsas-e-tirgi hai to suraj uchhaal de

warna dua na mang yahan inqilab ki

mahkum bastiyon se sarakne lagi hai dhup

wo ahd hun ki jis ne shafaq be-naqab ki

bijli chali gai to wo aankhon mein rah gaya

ab chhu ke paDh raha hun ibarat kitab ki

'shahid' kahan se ho ke guzarti hai aab-ju

rangat tamam surKH hai kyun sath-e-ab ki