KHulus chehron se hai numayan to phir nazar bad-guman kyon hai

ḳhulūs chehroñ se hai numāyāñ to phir nazar bad-gumān kyoñ hai

batā ki begānagī kā aalam mire tire darmiyān kyoñ hai

yahāñ vafā kī na qadr-o-qīmat na āshnā-e-vafā hai koī

mujhe vafā kā sila milegā ye mere dil meñ gumān kyoñ hai

kabhī na maiñ us taraf se guzrā na merā dast-e-talab hī phailā

to phir ye rāh-e-talab meñ āḳhir mire qadam kā nishān kyoñ hai

har ek dar par jabīñ jhukānā tujhe mubārak magar ye sun le

jo tujh meñ ḳhuddāriyāñ nahīñ haiñ to ishq kī ān-bān kyoñ hai

bahut dinoñ meñ amaañ milī hai ḳhud apne saa.e meñ aa ke mujh ko

ye sochtā huuñ ki ghar ke bāhar kisī taraf sā.ebān kyoñ hai

na un kā jalva na un kī yādeñ na un kā chehra na un kā partav

dimāġh rah rah ke pūchhtā hai makīñ nahīñ to makān kyoñ hai

koī to is meñ fareb hogā jise 'ziyā' maiñ samajh na paayā

na jaane kab se ye sochtā huuñ vo is qadar mehrbān kyoñ hai

KHulus chehron se hai numayan to phir nazar bad-guman kyon hai

bata ki beganagi ka aalam mere tere darmiyan kyon hai

yahan wafa ki na qadr-o-qimat na aashna-e-wafa hai koi

mujhe wafa ka sila milega ye mere dil mein guman kyon hai

kabhi na main us taraf se guzra na mera dast-e-talab hi phaila

to phir ye rah-e-talab mein aaKHir mere qadam ka nishan kyon hai

har ek dar par jabin jhukana tujhe mubarak magar ye sun le

jo tujh mein KHuddariyan nahin hain to ishq ki aan-ban kyon hai

bahut dinon mein aman mili hai KHud apne sae mein aa ke mujh ko

ye sochta hun ki ghar ke bahar kisi taraf saeban kyon hai

na un ka jalwa na un ki yaaden na un ka chehra na un ka partaw

dimagh rah rah ke puchhta hai makin nahin to makan kyon hai

koi to is mein fareb hoga jise 'ziya' main samajh na paya

na jaane kab se ye sochta hun wo is qadar mehrban kyon hai