KHulus isar parsai haya sadaqat hijab likhkhun

ḳhulūs īsār pārsā.ī hayā sadāqat hijāb likhkhūñ

maiñ lafz paanī ke DhūñD lā.ūñ to barf kī ye kitāb likhkhūñ

na maiñ huuñ gulchīñ na bāġhbāñ huuñ maiñ is gulistāñ kā mohtasib huuñ

zarā maiñ kāñTe shumār kar luuñ to par guloñ kā hisāb likhkhūñ

miTe miTe se hurūf ḳhat ke na jaane kyā kyā sunā rahe haiñ

maiñ āñsuoñ kī zabāñ samajh luuñ to tere ḳhat kā javāb likhkhūñ

mahaktā paikar hasīn rangat ye mast āñkheñ jhukī jhukī sī

batā tujhe maiñ gulāb likhkhūñ nasha likhkhūñ yā sharāb likhkhūñ

batā ye tū hī in āñsuoñ se maiñ zindagī ke likhūñ masā.il

ki tere chehre ke ḳhūbsūrat nuqūsh par ik kitāb likhkhūñ

jo bhīgī palkoñ se tum ne ik din vafā ke vā'de kiye the mujh se

tumhīñ batāo ki ab maiñ un ko sarāb likhkhūñ ki ḳhvāb likhkhūñ

sahar ke sar haiñ na jaane kitnī añdherī rātoñ ke qarz 'āmir'

dhueñ charāġhoñ ke deñ ijāzat to raushnī kā hisāb likhkhūñ

KHulus isar parsai haya sadaqat hijab likhkhun

main lafz pani ke DhunD laun to barf ki ye kitab likhkhun

na main hun gulchin na baghban hun main is gulistan ka mohtasib hun

zara main kanTe shumar kar lun to par gulon ka hisab likhkhun

miTe miTe se huruf KHat ke na jaane kya kya suna rahe hain

main aansuon ki zaban samajh lun to tere KHat ka jawab likhkhun

mahakta paikar hasin rangat ye mast aankhen jhuki jhuki si

bata tujhe main gulab likhkhun nasha likhkhun ya sharab likhkhun

bata ye tu hi in aansuon se main zindagi ke likhun masail

ki tere chehre ke KHubsurat nuqush par ek kitab likhkhun

jo bhigi palkon se tum ne ek din wafa ke wa'de kiye the mujh se

tumhin batao ki ab main un ko sarab likhkhun ki KHwab likhkhun

sahar ke sar hain na jaane kitni andheri raaton ke qarz 'amir'

dhuen charaghon ke den ijazat to raushni ka hisab likhkhun