KHumar-e-shab mein zamin ka chehra nikhar raha tha

ḳhumār-e-shab meñ zamīñ kā chehra nikhar rahā thā

koī sitāroñ kī pālkī meñ utar rahā thā

nahā rahe the shajar kisī jhiil ke kināre

falak ke taḳhte pe chāñd baiThā sañvar rahā thā

havā.eñ dīvār-o-dar ke pīchhe se jhāñktī thiiñ

dhuāñ lapeTe koī galī se guzar rahā thā

khaḌā thā merī galī se bāhar jahān saarā

maiñ ḳhvāb meñ apne aap se baat kar rahā thā

havā kā jhoñkā udaas kar ke chalā gayā hai

abhī abhī to maiñ jām-e-ġhaflat ko bhar rahā thā

aur ab Thahar jā 'naved' aage to kuchh nahīñ hai

tū umr bhar is ḳhayāl se be-ḳhabar rahā thā

KHumar-e-shab mein zamin ka chehra nikhar raha tha

koi sitaron ki palki mein utar raha tha

naha rahe the shajar kisi jhil ke kinare

falak ke taKHte pe chand baiTha sanwar raha tha

hawaen diwar-o-dar ke pichhe se jhankti thin

dhuan lapeTe koi gali se guzar raha tha

khaDa tha meri gali se bahar jahan sara

main KHwab mein apne aap se baat kar raha tha

hawa ka jhonka udas kar ke chala gaya hai

abhi abhi to main jam-e-ghaflat ko bhar raha tha

aur ab Thahar ja 'nawed' aage to kuchh nahin hai

tu umr bhar is KHayal se be-KHabar raha tha