KHush bahut aate hain mujhko raste dushwar se

ḳhush bahut aate haiñ mujh ko rāste dushvār se

sar-phirā huuñ maiñ nahīñ Dartā kisī dīvār se

manziloñ ko pal meñ pīchhe chhoḌtā jaatā huuñ maiñ

rāste bhī ḳhauf khāte haiñ mirī raftār se

ḳhāmushī se sūrateñ miT jā.eñgī manzar se kyā

kuchh nahīñ kahnā kisī ko ā.ina-bardār se

ḳhushk āñkhoñ se maiñ taktā huuñ kināre kī taraf

mujh ko sairābī bulātī hai samundar paar se

kyā mirā ghar bhī nahīñ haq meñ ki maiñ tanhā rahūñ

itnī vahshat ho rahī hai kyuuñ dar-o-dīvār se

āsmānoñ par paḌāv Dālnā to hai mujhe

guftugū hotī rahegī sābit-o-sayyār se

tum bhī ab kuchh aur socho is mohabbat ke sivā

maiñ bhī ab uktā gayā huuñ ek hī āzār se

maiñ sharīfoñ se sharāfat meñ bhī aage hī rahā

maiñ ne chālākī bhī sīkhī paa.e ke ayyār se

rāt-bhar is shahr meñ vo sānehe hote haiñ 'zeb'

dil dahal uThtā hai merā sub.h ke aḳhbār se

KHush bahut aate hain mujh ko raste dushwar se

sar-phira hun main nahin Darta kisi diwar se

manzilon ko pal mein pichhe chhoDta jata hun main

raste bhi KHauf khate hain meri raftar se

KHamushi se suraten miT jaengi manzar se kya

kuchh nahin kahna kisi ko aaina-bardar se

KHushk aankhon se main takta hun kinare ki taraf

mujh ko sairabi bulati hai samundar par se

kya mera ghar bhi nahin haq mein ki main tanha rahun

itni wahshat ho rahi hai kyun dar-o-diwar se

aasmanon par paDaw Dalna to hai mujhe

guftugu hoti rahegi sabit-o-sayyar se

tum bhi ab kuchh aur socho is mohabbat ke siwa

main bhi ab ukta gaya hun ek hi aazar se

main sharifon se sharafat mein bhi aage hi raha

main ne chaalaki bhi sikhi pae ke ayyar se

raat-bhar is shahr mein wo sanehe hote hain 'zeb'

dil dahal uThta hai mera subh ke aKHbar se