KHush-baKHtiyon ke dil-nashin aasab tum to ho

ḳhush-baḳhtiyoñ ke dil-nashīñ a.asāb tum to ho

husn-e-karam ke paikar-e-zartāb tum to ho

phailī huī haiñ fikr kī kirnoñ kī shoḳhiyāñ

charḳh-e-jamāl-o-husn ke mahtāb tum to ho

sochoñ ke ratjagoñ pe hai ġhāza bahār kā

ra.anā.iyoñ kī vādī-e-shādāb tum to ho

sāz-o-surod-e-ishq ke bajte haiñ taar taar

tanhā.iyoñ meñ dard kī mizrāb tum to ho

taaza haiñ terī yaad se sāñsoñ ke silsile

in silsiloñ kī mauj-e-samar-yāb tum to ho

har talḳhī-e-hayāt kā zahrāb pī ga.e

jis par jiye halāvat-e-nāyāb tum to ho

rusvā.iyoñ ke des meñ bikte rahe zamīr

nāmūs-e-qaum ḳhitta-e-punjab tum to ho

pighlā sakī na ibrat-o-ġhairat kī aañch kuchh

uf munjamid se sūrat-e-barfāb tum to ho

barbat ko thaam dil ko pakaḌ kar sukūñ se baiTh

mahfil meñ 'ain' vāqif-e-ādāb tum to ho

KHush-baKHtiyon ke dil-nashin aasab tum to ho

husn-e-karam ke paikar-e-zartab tum to ho

phaili hui hain fikr ki kirnon ki shoKHiyan

charKH-e-jamal-o-husn ke mahtab tum to ho

sochon ke ratjagon pe hai ghaza bahaar ka

ranaiyon ki wadi-e-shadab tum to ho

saz-o-surod-e-ishq ke bajte hain tar tar

tanhaiyon mein dard ki mizrab tum to ho

taza hain teri yaad se sanson ke silsile

in silsilon ki mauj-e-samar-yab tum to ho

har talKHi-e-hayat ka zahrab pi gae

jis par jiye halawat-e-nayab tum to ho

ruswaiyon ke des mein bikte rahe zamir

namus-e-qaum KHitta-e-punjab tum to ho

pighla saki na ibrat-o-ghairat ki aanch kuchh

uf munjamid se surat-e-barfab tum to ho

barbat ko tham dil ko pakaD kar sukun se baiTh

mahfil mein 'ain' waqif-e-adab tum to ho