KHush-kalami ka meri anjam ab bhi yaad hai

ḳhush-kalāmī kā mirī anjām ab bhī yaad hai

mere ehsānoñ kā har in'ām ab bhī yaad hai

rāhat-e-dil rāhat-e-jāñ paikar-e-gulnār thā

yaad hai vo shoḳhī-e-gulfām ab bhī yaad hai

bevafā.ī kar ke bhī vo ho ga.e haiñ nāmvar

be-sabab ham ho ga.e badnām ab bhī yaad hai

dil ke kūche meñ dabe paañv chalī aatī hai yaad

nīm-vā āñkhoñ kā vo paiġhām ab bhī yaad hai

muflis-o-nādār fāqa-kash the ham paivand-kār

aur kitne the hamāre naam ab bhī yaad hai

ik zarā sī baat par 'mohsin' vo us kā rūThnā

kitnī afsurda thī ik ik shaam ab bhī yaad hai

KHush-kalami ka meri anjam ab bhi yaad hai

mere ehsanon ka har in'am ab bhi yaad hai

rahat-e-dil rahat-e-jaan paikar-e-gulnar tha

yaad hai wo shoKHi-e-gulfam ab bhi yaad hai

bewafai kar ke bhi wo ho gae hain namwar

be-sabab hum ho gae badnam ab bhi yaad hai

dil ke kuche mein dabe panw chali aati hai yaad

nim-wa aankhon ka wo paigham ab bhi yaad hai

muflis-o-nadar faqa-kash the hum paiwand-kar

aur kitne the hamare nam ab bhi yaad hai

ek zara si baat par 'mohsin' wo us ka ruThna

kitni afsurda thi ek ek sham ab bhi yaad hai