KHush raha jae na ranjur hua jata hai

ḳhush rahā jaa.e na ranjūr huā jaatā hai

dastaras se mirī kyā duur huā jaatā hai

haath ik zaḳhm lagā thā jo rah-e-ulfat meñ

paas manzil ke vo nāsūr huā jaatā hai

muñh ke bal ḳhaak pe ġhash khā ke girā to ye khulā

fāqa-mastī se bhī maḳhmūr huā jaatā hai

aql kahtī hai ki hālāt se samjhautā kar

aur ye dil shah-e-mysore huā jaatā hai

aa.ino pūchh lo aakar mire dil se kaise

sang-bārī ke binā chuur huā jaatā hai

jaane kyā khīñch ke laa.ī hai mirī bīnā.ī

paas vaalā bhī bahut duur huā jaatā hai

ik zarā nuur kī bārish ke gire kyā qatre

koh-e-zulmāt bhī ab tuur huā jaatā hai

raushnī ham ne to sūraj kī nichoḌī 'shahbāz'

chehra kyoñ chāñd kā be-nūr huā jaatā hai

KHush raha jae na ranjur hua jata hai

dastaras se meri kya dur hua jata hai

hath ek zaKHm laga tha jo rah-e-ulfat mein

pas manzil ke wo nasur hua jata hai

munh ke bal KHak pe ghash kha ke gira to ye khula

faqa-masti se bhi maKHmur hua jata hai

aql kahti hai ki haalat se samjhauta kar

aur ye dil shah-e-mysore hua jata hai

aaino puchh lo aakar mere dil se kaise

sang-bari ke bina chur hua jata hai

jaane kya khinch ke lai hai meri binai

pas wala bhi bahut dur hua jata hai

ek zara nur ki barish ke gire kya qatre

koh-e-zulmat bhi ab tur hua jata hai

raushni hum ne to suraj ki nichoDi 'shahbaz'

chehra kyon chand ka be-nur hua jata hai