KHush to lagta hai magar dil se KHafa ho jaise

ḳhush to lagtā hai magar dil se ḳhafā ho jaise

dard ab ḳhud hī nazar aa.e davā ho jaise

merā ye naġhma ho sahrā kā sukūt-e-markaz

terā ik harf kisī gul kī navā ho jaise

mujh ko merā hī nahīñ 'ilm na terī hai ḳhabar

zindagī ab kisī bachche kī du'ā ho jaise

ab ke dil aur hī ḳhvāhish kā huā hai tālib

dil mirā dil nahīñ ab rāh-e-fanā ho jaise

yuuñ na aa.e ki pashemāñ bhī ho ḳhush-bāsh bhī ho

vo mire paas rahe mujh se judā ho jaise

maiñ ne ye 'umr gañvā.ī hai kahāñ kaaTī hai

pūchhtā aise hai mujh se ki ḳhudā ho jaise

tū kisī aur hī paikar kā huā gul sābit

terī sūrat kisī gulshan se sivā ho jaise

tere afkār mire zehn se yuuñ gir baiThe

kisī būḌhe kā koī sajda qazā ho jaise

is qadar dard hai saudā hai junūñ hai ġham hai

dil pe ik zaḳhm nayā aur lagā ho jaise

sun ke baat us kī mujhe lagtā hai yuuñ ab 'kāvish'

vo mirī jaan ke dushman se milā ho jaise

KHush to lagta hai magar dil se KHafa ho jaise

dard ab KHud hi nazar aae dawa ho jaise

mera ye naghma ho sahra ka sukut-e-markaz

tera ek harf kisi gul ki nawa ho jaise

mujh ko mera hi nahin 'ilm na teri hai KHabar

zindagi ab kisi bachche ki du'a ho jaise

ab ke dil aur hi KHwahish ka hua hai talib

dil mera dil nahin ab rah-e-fana ho jaise

yun na aae ki pasheman bhi ho KHush-bash bhi ho

wo mere pas rahe mujh se juda ho jaise

main ne ye 'umr ganwai hai kahan kaTi hai

puchhta aise hai mujh se ki KHuda ho jaise

tu kisi aur hi paikar ka hua gul sabit

teri surat kisi gulshan se siwa ho jaise

tere afkar mere zehn se yun gir baiThe

kisi buDhe ka koi sajda qaza ho jaise

is qadar dard hai sauda hai junun hai gham hai

dil pe ek zaKHm naya aur laga ho jaise

sun ke baat us ki mujhe lagta hai yun ab 'kawish'

wo meri jaan ke dushman se mila ho jaise