KHushamad kar ke yan laya gaya hun

ḳhushāmad kar ke yaañ laayā gayā huuñ

magar mahfil se uThvāyā gayā huuñ

achānak chhoḌ kar yuuñ bazm-e-jānāñ

nahīñ aayā magar laayā gayā huuñ

farishta huuñ na koī pārsā huuñ

maiñ aadam huuñ jo bahkāyā gayā huuñ

maiñ huuñ ik ḳhvāb par itnā batā de

tirī āñkhoñ meñ kyoñ paayā gayā huuñ

dikhā kar chāñd meñ chehra tumhārā

kisī bachche sā bahlāyā gayā huuñ

musalsal hichkiyāñ aane lagī haiñ

to kyā maiñ yaad farmāyā gayā huuñ

musāfir thā sarā-e-dil meñ tere

faqat kuchh din hī to aayā gayā huuñ

tavaqqo' yuuñ to un se kuchh nahīñ thī

bharosa de ke bharmāyā gayā huuñ

visāl-e-yār hai 'sāhil' qazā to

malā.ik bhej bulvāyā gayā huuñ

KHushamad kar ke yan laya gaya hun

magar mahfil se uThwaya gaya hun

achanak chhoD kar yun bazm-e-jaanan

nahin aaya magar laya gaya hun

farishta hun na koi parsa hun

main aadam hun jo bahkaya gaya hun

main hun ek KHwab par itna bata de

teri aankhon mein kyon paya gaya hun

dikha kar chand mein chehra tumhaara

kisi bachche sa bahlaya gaya hun

musalsal hichkiyan aane lagi hain

to kya main yaad farmaya gaya hun

musafir tha sara-e-dil mein tere

faqat kuchh din hi to aaya gaya hun

tawaqqo' yun to un se kuchh nahin thi

bharosa de ke bharmaya gaya hun

visal-e-yar hai 'sahil' qaza to

malaik bhej bulwaya gaya hun