KHushbu hai hawaon mein bikhar jae to achchha

ḳhushbū hai havāoñ meñ bikhar jaa.e to achchhā

sāñsoñ meñ ye logoñ kī utar jaa.e to achchhā

baḌ-bole ko muñh koī lagā.egā bhalā kyoñ

nashsha ye takabbur kā utar jaa.e to achchhā

chhitnār shajar detā hai raahī ko nayā azm

is rāh-guzar se tū guzar jaa.e to achchhā

rut koī bhī shādāb nahīñ dekhī to is ke

siine meñ tamannā hai jo mar jaa.e to achchhā

uljhā huā pariyoñ ke hai afsānoñ meñ nādāñ

tū shahr-e-tilismāt meñ Dar jaa.e to achchhā

hamjoliyāñ dul.han kī isī dhun meñ lagī haiñ

ruup is kā zarā aur sañvar jaa.e to achchhā

vo va.ada-ḳhilāfī kī shikāyat na kareñge

va.ade se 'azīm' apne mukar jaa.e to achchhā

KHushbu hai hawaon mein bikhar jae to achchha

sanson mein ye logon ki utar jae to achchha

baD-bole ko munh koi lagaega bhala kyon

nashsha ye takabbur ka utar jae to achchha

chhitnar shajar deta hai rahi ko naya azm

is rah-guzar se tu guzar jae to achchha

rut koi bhi shadab nahin dekhi to is ke

sine mein tamanna hai jo mar jae to achchha

uljha hua pariyon ke hai afsanon mein nadan

tu shahr-e-tilismat mein Dar jae to achchha

hamjoliyan dulhan ki isi dhun mein lagi hain

rup is ka zara aur sanwar jae to achchha

wo wada-KHilafi ki shikayat na karenge

wade se 'azim' apne mukar jae to achchha