KHushbu hai shararat hai rangin jawani hai

ḳhushbū hai sharārat hai rañgīn javānī hai

yādoñ ke paristāñ meñ shīshe kī kahānī hai

maazī kī haqīqat hai is daur meñ afsāna

siitā bhī kahānī hai mariyam bhī kahānī hai

dushman se ḳhatar vaalo lamhoñ pe nazar rakhnā

har lamha-e-hastī bhī talvār kā paanī hai

hoñToñ kā mahak uThnā āñchal kā Dhalak jaanā

in paak gunāhoñ kī tārīḳh purānī hai

is shoḳh ke matavālo rag rag se lahū māñgo

patthar pe ġham-e-dil kī tasvīr banānī hai

barsāt meñ bhīgā hai doshīza badan us kā

nāseh ko bhī bulvā lo ab aag meñ paanī hai

tārīḳh-e-badāyūñ meñ mārūf suḳhan-var haiñ

'saifī' kī nazar lekin girvīda-e-'fānī' hai

KHushbu hai shararat hai rangin jawani hai

yaadon ke paristan mein shishe ki kahani hai

mazi ki haqiqat hai is daur mein afsana

sita bhi kahani hai mariyam bhi kahani hai

dushman se KHatar walo lamhon pe nazar rakhna

har lamha-e-hasti bhi talwar ka pani hai

honTon ka mahak uThna aanchal ka Dhalak jaana

in pak gunahon ki tariKH purani hai

is shoKH ke matawalo rag rag se lahu mango

patthar pe gham-e-dil ki taswir banani hai

barsat mein bhiga hai doshiza badan us ka

naseh ko bhi bulwa lo ab aag mein pani hai

tariKH-e-badayun mein maruf suKHan-war hain

'saifi' ki nazar lekin girwida-e-'fani' hai