KHushbu ko rangton pe ubharta hua bhi dekh

ḳhushbū ko rañgtoñ pe ubhartā huā bhī dekh

naqsh-e-zar-e-bahār chamaktā huā bhī dekh

rakh ke madār-e-shauq kisī āftāb par

tū sañg-e-intizār pighaltā huā bhī dekh

āñkhoñ ke gird jhāñkte halqe na dekh tū

sail-e-ḳhajista-ḳhū ko utartā huā bhī dekh

be-faiz dasht-e-dard meñ āhistagī ke saath

āhū-sarisht logoñ ko chaltā huā bhī dekh

rañg-e-hinā ko naqsh-e-qadam se judā bhī kar

sahrā meñ raḳhsh-e-shauq ko girtā huā bhī bhī dekh

mahsūs kar chhalakte hue shauq kī jalan

yaḳh chāñdnī meñ jism ko jaltā huā bhī dekh

har chiiz de ke jaatī hai apnī nishāniyāñ

har gul meñ rañg-e-sub.h jhalaktā huā bhī dekh

'nāhīd' chīra-e-dastī-e-yārāñ aziiz rakh

mauqe ke saath un ko badaltā huā bhī dekh

KHushbu ko rangton pe ubharta hua bhi dekh

naqsh-e-zar-e-bahaar chamakta hua bhi dekh

rakh ke madar-e-shauq kisi aaftab par

tu sang-e-intizar pighalta hua bhi dekh

aankhon ke gird jhankte halqe na dekh tu

sail-e-KHajista-KHu ko utarta hua bhi dekh

be-faiz dasht-e-dard mein aahistagi ke sath

aahu-sarisht logon ko chalta hua bhi dekh

rang-e-hina ko naqsh-e-qadam se juda bhi kar

sahra mein raKHsh-e-shauq ko girta hua bhi bhi dekh

mahsus kar chhalakte hue shauq ki jalan

yaKH chandni mein jism ko jalta hua bhi dekh

har chiz de ke jati hai apni nishaniyan

har gul mein rang-e-subh jhalakta hua bhi dekh

'nahid' chira-e-dasti-e-yaran aziz rakh

mauqe ke sath un ko badalta hua bhi dekh