KHushi aati hai jab bhi zindagi mein gham samajhte hain

ḳhushī aatī hai jab bhī zindagī meñ ġham samajhte haiñ

'ajab ulTā zamāne kī ravish ko ham samajhte haiñ

mire zaḳhmoñ pe jo ashkoñ kā phāhā rakh diyā tum ne

mirī jaañ ham bhī is ko pyaar kā marham samajhte haiñ

na jaane ātish-e-furqat meñ ham kyoñ jalte rahte haiñ

na jī ko jī samajhte haiñ na dam ko dam samajhte haiñ

hamāre dil ko āḳhir chuTkiyoñ se kyoñ masalte ho

tumhārī is adā ko jān-e-jānāñ ham samajhte haiñ

tumhārī madh-bharī āñkhoñ se piine kī tamannā hai

tumhāre āñsuoñ ko ham to jām-e-jam samajhte haiñ

tumhāre husn kī rangīn adā.eñ dekh kar ham bhī

kabhī sho'la kabhī kāñTā kabhī shabnam samajhte haiñ

ye maanā shā'irī 'aḳhtar' kī shīrīnī se ḳhālī hai

magar lazzat hai jo is shā'irī meñ ham samajhte haiñ

KHushi aati hai jab bhi zindagi mein gham samajhte hain

'ajab ulTa zamane ki rawish ko hum samajhte hain

mere zaKHmon pe jo ashkon ka phaha rakh diya tum ne

meri jaan hum bhi is ko pyar ka marham samajhte hain

na jaane aatish-e-furqat mein hum kyon jalte rahte hain

na ji ko ji samajhte hain na dam ko dam samajhte hain

hamare dil ko aaKHir chuTkiyon se kyon masalte ho

tumhaari is ada ko jaan-e-jaanan hum samajhte hain

tumhaari madh-bhari aankhon se pine ki tamanna hai

tumhaare aansuon ko hum to jam-e-jam samajhte hain

tumhaare husn ki rangin adaen dekh kar hum bhi

kabhi sho'la kabhi kanTa kabhi shabnam samajhte hain

ye mana sha'iri 'aKHtar' ki shirini se KHali hai

magar lazzat hai jo is sha'iri mein hum samajhte hain