KHushi ka dusra pahlu hai aur gham kya hai

ḳhushī kā dūsrā pahlū hai aur ġham kyā hai

nafas kī āmad-o-shud hī to hai ye dam kyā hai

paḌhā thā kātib-e-taqdīr kā likhā ham ne

tabhī chalā thā pata vaq.at-e-qalam kyā hai

koī bhī Thiik kabhī Thiik se nahīñ rakkhā

mujhe pata hī nahīñ besh kyā hai kam kyā hai

jhuke na yaar ke dar par to vo jabīñ kaisī

uThe na jānib-e-manzil to vo qadam kyā hai

kuchh aisā farq nahīñ e'tiqād kī saugand

mujhe ḳhabar hai yaqīñ kyā hai aur bharam kyā hai

yahī ki jhelūñgā hañs hañs ke sab masā.ib maiñ

mujhe pata hai jabīñ pe mirī raqam kyā hai

maiñ maañg maañg ke 'rāhat' duā.eñ samjhā huuñ

jahāñ meñ ġhair-aham kyā hai aur aham kyā hai

KHushi ka dusra pahlu hai aur gham kya hai

nafas ki aamad-o-shud hi to hai ye dam kya hai

paDha tha katib-e-taqdir ka likha hum ne

tabhi chala tha pata waqat-e-qalam kya hai

koi bhi Thik kabhi Thik se nahin rakkha

mujhe pata hi nahin besh kya hai kam kya hai

jhuke na yar ke dar par to wo jabin kaisi

uThe na jaanib-e-manzil to wo qadam kya hai

kuchh aisa farq nahin e'tiqad ki saugand

mujhe KHabar hai yaqin kya hai aur bharam kya hai

yahi ki jhelunga hans hans ke sab masaib main

mujhe pata hai jabin pe meri raqam kya hai

main mang mang ke 'rahat' duaen samjha hun

jahan mein ghair-aham kya hai aur aham kya hai