KHushi ke sath abhi gham ka nam baqi hai

ḳhushī ke saath abhī ġham kā naam baaqī hai

tabhī to silsila-e-sub.h-o-shām baaqī hai

na jaane kitne hue qatl tere abrū se

mazīd aur bhī kyā qatl-e-ām baaqī hai

hamārī yaad jo pīchhā kare samajh lenā

tumhāre dil maiñ vafā kā maqām baaqī hai

na rok mutrib-e-gulfām saaz ko apne

abhī to gardish-e-mīnā-o-jām baaqī hai

zarā sī pī ke bahakte ho kis liye rindo

abhī sharāb abhī daur-e-jām baaqī hai

firāq-e-yār maiñ ashkoñ kā merī mizhgāñ par

ḳhudā ke fazl se raqs-e-davām baaqī hai

chaman ke ġhuncha-o-gul meñ bhī aaj tak 'ḳhākī'

vahī tabassum-e-mast-e-ḳhirām baaqī hai

KHushi ke sath abhi gham ka nam baqi hai

tabhi to silsila-e-subh-o-sham baqi hai

na jaane kitne hue qatl tere abru se

mazid aur bhi kya qatl-e-am baqi hai

hamari yaad jo pichha kare samajh lena

tumhaare dil main wafa ka maqam baqi hai

na rok mutrib-e-gulfam saz ko apne

abhi to gardish-e-mina-o-jam baqi hai

zara si pi ke bahakte ho kis liye rindo

abhi sharab abhi daur-e-jam baqi hai

firaq-e-yar main ashkon ka meri mizhgan par

KHuda ke fazl se raqs-e-dawam baqi hai

chaman ke ghuncha-o-gul mein bhi aaj tak 'KHaki'

wahi tabassum-e-mast-e-KHiram baqi hai