KHushi ki bazm mein ranj-o-mehan ki baat karta hun

ḳhushī kī bazm meñ ranj-o-mehan kī baat kartā huuñ

tahī hai jaam sahbā-e-kuhan kī baat kartā huuñ

na ḳhāroñ se mujhe nafrat na phūloñ se mujhe ulfat

ḳhizāñ jis meñ na aa.e us chaman kī baat kartā huuñ

mire dil meñ bhī ik sho'la mohabbat kā farozāñ hai

maiñ kahne ko to qais-o-kohkan kī baat kartā huuñ

mire afsāna-e-ġham meñ har ik kā qissa-e-ġham hai

maiñ apnī baat kyā ik anjuman kī baat kartā huuñ

mirī hiddat nahīñ 'sājid' zamāne kā taqāza hai

jo maiñ apnī ġhazal meñ fikr-o-fan kī baat kartā huuñ

KHushi ki bazm mein ranj-o-mehan ki baat karta hun

tahi hai jam sahba-e-kuhan ki baat karta hun

na KHaron se mujhe nafrat na phulon se mujhe ulfat

KHizan jis mein na aae us chaman ki baat karta hun

mere dil mein bhi ek sho'la mohabbat ka farozan hai

main kahne ko to qais-o-kohkan ki baat karta hun

mere afsana-e-gham mein har ek ka qissa-e-gham hai

main apni baat kya ek anjuman ki baat karta hun

meri hiddat nahin 'sajid' zamane ka taqaza hai

jo main apni ghazal mein fikr-o-fan ki baat karta hun