KHushi ki saaten gham ki faza na ras aai

ḳhushī kī sā.ateñ ġham kī fazā na raas aa.ī

ki zindagī ko koī bhī adā na raas aa.ī

jise talāsh kiyā ḳhud ko bhuul kar ham ne

usī jazīre kī āb-o-havā na raas aa.ī

parā.e ghar ke makīnoñ se kyā gila shikva

hameñ to apne hī ghar kī fazā na raas aa.ī

vahī huā ki tirā haath tujh se maañg liyā

mohabbatoñ ke safar meñ anā na raas aa.ī

ka.ī charāġh haiñ raushan fasīl-e-shab pe magar

ka.ī charāġhoñ ko taaza havā na raas aa.ī

barahna karne lagī inqalāb kī āñdhī

qabā-e-jāh-o-hasham bhī zarā na raas aa.ī

hujūm-e-shahr meñ har aadmī akelā hai

yahāñ kisī ko kisī kī vafā na raas aa.ī

vo qabr jaise makānoñ meñ kaise zinda haiñ

jinheñ kushāda gharoñ kī fazā na raas aa.ī

KHushi ki saaten gham ki faza na ras aai

ki zindagi ko koi bhi ada na ras aai

jise talash kiya KHud ko bhul kar hum ne

usi jazire ki aab-o-hawa na ras aai

parae ghar ke makinon se kya gila shikwa

hamein to apne hi ghar ki faza na ras aai

wahi hua ki tera hath tujh se mang liya

mohabbaton ke safar mein ana na ras aai

kai charagh hain raushan fasil-e-shab pe magar

kai charaghon ko taza hawa na ras aai

barahna karne lagi inqalab ki aandhi

qaba-e-jah-o-hasham bhi zara na ras aai

hujum-e-shahr mein har aadmi akela hai

yahan kisi ko kisi ki wafa na ras aai

wo qabr jaise makanon mein kaise zinda hain

jinhen kushada gharon ki faza na ras aai