KHushi mein dil ke dagh ko jala jala ke pi gaya

ḳhushī meñ dil ke daaġh ko jalā jalā ke pī gayā

havas kī tez aañch ko bujhā bujhā ke pī gayā

nazar ke sāgaroñ meñ jo bharī thī tū ne arġhavāñ

tirī hasīn aañkh se churā churā ke pī gayā

nasīhatoñ ke darmiyāñ jo tak rahī thī jaam ko

usī nigāh-e-bad se maiñ bachā bachā ke pī gayā

milī jo tere haath se to ho gayā nasha do-chand

raqīb-e-rū-siyāh ko dikhā dikhā ke pī gayā

qalīl bhī milī kabhī to kī isī pe iktifā

baḌhī huī talab ko maiñ dabā dabā ke pī gayā

jhukī jhukī nigāh meñ hazār kaif-o-mastiyāñ

usī nigāh-e-nāz ko uThā uThā ke pī gayā

falak pe kaalī badliyāñ qarīb-e-rūh-e-dilkashī

piyāle se piyāle ko milā milā ke pī gayā

KHushi mein dil ke dagh ko jala jala ke pi gaya

hawas ki tez aanch ko bujha bujha ke pi gaya

nazar ke sagaron mein jo bhari thi tu ne arghawan

teri hasin aankh se chura chura ke pi gaya

nasihaton ke darmiyan jo tak rahi thi jam ko

usi nigah-e-bad se main bacha bacha ke pi gaya

mili jo tere hath se to ho gaya nasha do-chand

raqib-e-ru-siyah ko dikha dikha ke pi gaya

qalil bhi mili kabhi to ki isi pe iktifa

baDhi hui talab ko main daba daba ke pi gaya

jhuki jhuki nigah mein hazar kaif-o-mastiyan

usi nigah-e-naz ko uTha uTha ke pi gaya

falak pe kali badliyan qarib-e-ruh-e-dilkashi

piyale se piyale ko mila mila ke pi gaya