KHushi se zist ka har dukh uThae jate hain

ḳhushī se ziist kā har dukh uThā.e jaate haiñ

ham ahl-e-dil kī rivāyat nibhā.e jaate haiñ

junūñ kī raah meñ bujh bujh ke ab bhī dīvāne

charāġh shola-e-jāñ se jalā.e jaate haiñ

vo fard-e-jurm hī ai munsifo nahīñ merī

mujhe ye faisle jis par sunā.e jaate haiñ

ta.alluqāt meñ do tarfa sard-mehrī hai

bas ek vaz.a ko donoñ nibhā.e jaate haiñ

ḳhushī to DhūñDe bhī is daur meñ nahīñ miltī

ye kaun log haiñ jo muskurā.e jaate haiñ

KHushi se zist ka har dukh uThae jate hain

hum ahl-e-dil ki riwayat nibhae jate hain

junun ki rah mein bujh bujh ke ab bhi diwane

charagh shola-e-jaan se jalae jate hain

wo fard-e-jurm hi ai munsifo nahin meri

mujhe ye faisle jis par sunae jate hain

talluqat mein do tarfa sard-mehri hai

bas ek waza ko donon nibhae jate hain

KHushi to DhunDe bhi is daur mein nahin milti

ye kaun log hain jo muskurae jate hain