KHushiyan hon sirf jis mein ye gham ka dhuan na ho

ḳhushiyāñ hoñ sirf jis meñ ye ġham kā dhuāñ na ho

koī zamīñ nahīñ hai jahāñ āsmāñ na ho

us ko bhī sīñche hai ḳhudā rahmat kī chhāñv meñ

duniyā meñ jis chaman kā koī bāġhbāñ na ho

phirtī ho dar-ba-dar sī mirī hasrato kahāñ

koī tumhāre jaisā yahāñ be-makāñ na ho

lāzim hai ehtijāj havāoñ kā is liye

zulmat kī rah-guzar pe koī kārvāñ na ho

nafrat kī aag meñ jo usūloñ ko jhoñk de

aisā bhī masnadoñ pe koī hukmarāñ na ho

qaa.em karo yahāñ na.ī ulfat ke silsile

rāhoñ meñ vahshatoñ kā ye nām-o-nishāñ na ho

'ābid' jalāo pyaar kī sham'oñ ko har taraf

in nafratoñ meñ taaki koī bad-gumāñ na ho

KHushiyan hon sirf jis mein ye gham ka dhuan na ho

koi zamin nahin hai jahan aasman na ho

us ko bhi sinche hai KHuda rahmat ki chhanw mein

duniya mein jis chaman ka koi baghban na ho

phirti ho dar-ba-dar si meri hasrato kahan

koi tumhaare jaisa yahan be-makan na ho

lazim hai ehtijaj hawaon ka is liye

zulmat ki rah-guzar pe koi karwan na ho

nafrat ki aag mein jo usulon ko jhonk de

aisa bhi masnadon pe koi hukmaran na ho

qaem karo yahan nai ulfat ke silsile

rahon mein wahshaton ka ye nam-o-nishan na ho

'abid' jalao pyar ki sham'on ko har taraf

in nafraton mein taki koi bad-guman na ho