KHushiyon se mizajan koi yakjai nahin thi

ḳhushiyoñ se mizājan koī yakjā.ī nahīñ thī

kuchh ġham the magar un se shanāsā.ī nahīñ thī

paayā use ham ne jise khoyā hī nahīñ thā

aur kho ga.ī vo shai jo kabhī paa.ī nahīñ thī

hai yaad bahut tez chhanākā sā huā thā

phir der talak koī sadā aa.ī nahīñ thī

chehroñ meñ bhaTaktī huī is dil kī tabī'at

bechain to kah sakte ho harjā.ī nahīñ thī

ham ne to qasam khaa.ī thī boleñge na tum se

tum ne to koī aisī qasam khaa.ī nahīñ thī

bas dil thā hamārā ki jahāñ Duub sake ham

dil jitnī un āñkhoñ meñ bhī gahrā.ī nahīñ thī

KHushiyon se mizajan koi yakjai nahin thi

kuchh gham the magar un se shanasai nahin thi

paya use hum ne jise khoya hi nahin tha

aur kho gai wo shai jo kabhi pai nahin thi

hai yaad bahut tez chhanaka sa hua tha

phir der talak koi sada aai nahin thi

chehron mein bhaTakti hui is dil ki tabi'at

bechain to kah sakte ho harjai nahin thi

hum ne to qasam khai thi bolenge na tum se

tum ne to koi aisi qasam khai nahin thi

bas dil tha hamara ki jahan Dub sake hum

dil jitni un aankhon mein bhi gahrai nahin thi