KHushk ho gain nahren peD jal chuke hain kya

ḳhushk ho ga.iiñ nahreñ peḌ jal chuke haiñ kyā

kuchh chaman the raste meñ dasht ho ga.e haiñ kyā

ek ek se pūchhā ham ne ek vahshat meñ

zindagī ke baare meñ aap jānte haiñ kyā

iltifāt mushkil hai baat to kiyā kiije

ham nahīñ bure itne itne hī bure haiñ kyā

apnī zindagānī ko aur rā.egānī ko

ham uThā.e phirte haiñ log dekhte haiñ kyā

yūñhī āte-jāte ho be-sabab satāte ho

sañg to nahīñ haiñ ham raah meñ paḌe haiñ kyā

ḳhvāb dekhne vaale mo'atabar hue kaise

ye purāne sikke yaañ phir se chal rahe haiñ kyā

sabr kar liyā jaa.e ab bhī jaane vāloñ par

pahle jaane vaale bhī vāpas aa sake haiñ kyā

ham ne ik tamannā kā rāsta chunā to hai

ek rāste meñ bhī aur rāste haiñ kyā

ishtiyāq kitnā thā aur firāq kitnā thā

jaane pūchhte haiñ kyuuñ jaane pūchhte haiñ kyā

jab rahā na kuchh chāra ham ne haar maanī thī

bas yahī kahānī thī aap ro paḌe haiñ kyā

KHushk ho gain nahren peD jal chuke hain kya

kuchh chaman the raste mein dasht ho gae hain kya

ek ek se puchha hum ne ek wahshat mein

zindagi ke bare mein aap jaante hain kya

iltifat mushkil hai baat to kiya kije

hum nahin bure itne itne hi bure hain kya

apni zindagani ko aur raegani ko

hum uThae phirte hain log dekhte hain kya

yunhi aate-jate ho be-sabab satate ho

sang to nahin hain hum rah mein paDe hain kya

KHwab dekhne wale mo'atabar hue kaise

ye purane sikke yan phir se chal rahe hain kya

sabr kar liya jae ab bhi jaane walon par

pahle jaane wale bhi wapas aa sake hain kya

hum ne ek tamanna ka rasta chuna to hai

ek raste mein bhi aur raste hain kya

ishtiyaq kitna tha aur firaq kitna tha

jaane puchhte hain kyun jaane puchhte hain kya

jab raha na kuchh chaara hum ne haar mani thi

bas yahi kahani thi aap ro paDe hain kya