KHushk honTon ki ana mail-e-saghar kyun hai

ḳhushk hoñToñ kī anā mā.il-e-sāġhar kyuuñ hai

tū samundar hai to ye pyaas kā manzar kyuuñ hai

ye fusūñ-kārī-e-ehsās hai yā aks-e-hayāt

ā.ina-ḳhāne kā har aa.ina shashdar kyuuñ hai

qurb-e-sāhil bhī Thahartī nahīñ ab kashtī-e-jāñ

itnā barham mire andar kā samundar kyuuñ hai

sho.ala sho.ala hai har ik shāḳh mirī palkoñ kī

phir bhī āñkhoñ meñ hasīñ ḳhvāb kā paikar kyuuñ hai

jumbish-e-lab kī bhī jur.at nahīñ hāsil hai agar

phir mire dil meñ ye jazbāt kā lashkar kyuuñ hai

kyā koī lamha-e-jāñ-soz hai aane vaalā

lau diye kī mire is raat fuzūñ-tar kyuuñ hai

Dhañg aayā na tujhe bhes badalne kā 'sa.īd'

baat jo dil meñ hai tere vahī lab par kyuuñ hai

KHushk honTon ki ana mail-e-saghar kyun hai

tu samundar hai to ye pyas ka manzar kyun hai

ye fusun-kari-e-ehsas hai ya aks-e-hayat

aaina-KHane ka har aaina shashdar kyun hai

qurb-e-sahil bhi Thaharti nahin ab kashti-e-jaan

itna barham mere andar ka samundar kyun hai

shoala shoala hai har ek shaKH meri palkon ki

phir bhi aankhon mein hasin KHwab ka paikar kyun hai

jumbish-e-lab ki bhi jurat nahin hasil hai agar

phir mere dil mein ye jazbaat ka lashkar kyun hai

kya koi lamha-e-jaan-soz hai aane wala

lau diye ki mere is raat fuzun-tar kyun hai

Dhang aaya na tujhe bhes badalne ka 'said'

baat jo dil mein hai tere wahi lab par kyun hai