KHub farmaya ki apna pyar rahne dijiye

ḳhuub farmāyā ki apnā pyaar rahne dījiye

aap hī ye ġhamza-o-inkār rahne dījiye

chāñdnī barsāt kī nikhrī hai chaltī hai 'nasīm'

aaj to lillāh ye inkār rahne dījiye

chashm-e-bad-dūr aap kī nazreñ haiñ ḳhud mauj-e-sharāb

bas mujhe be-mai piye sarshār rahne dījiye

kījiye apnī nigāh-e-fitna-afzā kā 'ilāj

nargis-e-bīmār ko bīmār rahne dījiye

chhoḌne kā maiñ nahīñ ab aap ko ai jān-e-jāñ

hai agar mujh par ḳhudā kī maar rahne dījiye

ham-kinār us bahr-e-ḳhūbī se na hoñge 'akbar' aap

aise mansūbe samundar-pār rahne dījiye

KHub farmaya ki apna pyar rahne dijiye

aap hi ye ghamza-o-inkar rahne dijiye

chandni barsat ki nikhri hai chalti hai 'nasim'

aaj to lillah ye inkar rahne dijiye

chashm-e-bad-dur aap ki nazren hain KHud mauj-e-sharab

bas mujhe be-mai piye sarshaar rahne dijiye

kijiye apni nigah-e-fitna-afza ka 'ilaj

nargis-e-bimar ko bimar rahne dijiye

chhoDne ka main nahin ab aap ko ai jaan-e-jaan

hai agar mujh par KHuda ki mar rahne dijiye

ham-kinar us bahr-e-KHubi se na honge 'akbar' aap

aise mansube samundar-par rahne dijiye