KHub hai KHub uDa ai shab-e-furqat ke maze

ḳhuub hai ḳhuub uḌā ai shab-e-furqat ke maze

lutf har-hāl meñ dete haiñ mohabbat ke maze

ġhair kyā jaane bhalā aish ke ishrat ke maze

haañ musībat se huā karte haiñ rāhat ke maze

aish karte haiñ judā.ī meñ bhī hijrāñ-dīda

rāt-din lūTte haiñ aap kī hasrat ke maze

aap kyā pūchhte haiñ hāl-e-dil-e-zār mirā

talḳh karte haiñ shikāyat ko muravvat ke maze

jam.a rakhtā huuñ hazāroñ diram-e-dāġh-e-jigar

ye badaulat tirī ġhurbat meñ haiñ daulat ke maze

aish-o-ārām-talab log inheñ kyā jāneñ

ham se pūchhe koī aafat ke musībat ke maze

muñh se inkār hai āñkhoñ se hai iqrār-e-visāl

dil se pūchheñ tirī shoḳhī-o-sharārat ke maze

yā shab-e-vasl meñ luuTe haiñ maze ḳhajlat ke

yā mile 'lutf' ko dīdār meñ ġhairat ke maze

KHub hai KHub uDa ai shab-e-furqat ke maze

lutf har-haal mein dete hain mohabbat ke maze

ghair kya jaane bhala aish ke ishrat ke maze

han musibat se hua karte hain rahat ke maze

aish karte hain judai mein bhi hijran-dida

raat-din luTte hain aap ki hasrat ke maze

aap kya puchhte hain haal-e-dil-e-zar mera

talKH karte hain shikayat ko murawwat ke maze

jama rakhta hun hazaron diram-e-dagh-e-jigar

ye badaulat teri ghurbat mein hain daulat ke maze

aish-o-aram-talab log inhen kya jaanen

hum se puchhe koi aafat ke musibat ke maze

munh se inkar hai aankhon se hai iqrar-e-visal

dil se puchhen teri shoKHi-o-shararat ke maze

ya shab-e-wasl mein luTe hain maze KHajlat ke

ya mile 'lutf' ko didar mein ghairat ke maze