KHub hi chalti hui wo nargis-e-mastana hai

ḳhuub hī chaltī huī vo nargis-e-mastāna hai

āshnā se āshnā begāne se begāna hai

aate jaate haiñ na.e har roz murġh-e-nāma-bar

banda-parvar aap kā ghar bhī kabūtar-ḳhāna hai

fātiha paḌhne ko aaya thā magar vo sham.a-rū

aaj merī qabr kā jo phuul hai parvāna hai

pā-e-sāqī par girāyā jab girāyā hai mujhe

chaal se ḳhālī kahāñ ye laġhzish-e-mastāna hai

mujh ko le jā kar kahā nāseh ne un ke rū-ba-rū

aap ke sar kī qasam ye aap kā dīvāna hai

'dāġh' ye hai kū-e-qātil maan nādāñ zid na kar

uTh yahāñ se aa idhar ghar baiTh kuchh dīvāna hai

KHub hi chalti hui wo nargis-e-mastana hai

aashna se aashna begane se begana hai

aate jate hain nae har roz murgh-e-nama-bar

banda-parwar aap ka ghar bhi kabutar-KHana hai

fatiha paDhne ko aaya tha magar wo shama-ru

aaj meri qabr ka jo phul hai parwana hai

pa-e-saqi par giraya jab giraya hai mujhe

chaal se KHali kahan ye laghzish-e-mastana hai

mujh ko le ja kar kaha naseh ne un ke ru-ba-ru

aap ke sar ki qasam ye aap ka diwana hai

'dagh' ye hai ku-e-qatil man nadan zid na kar

uTh yahan se aa idhar ghar baiTh kuchh diwana hai