KHub KHabar lete hain meri KHair se ye aghyar bahut

ḳhuub ḳhabar lete haiñ merī ḳhair se ye aġhyār bahut

dost ko bad-zan karne vaale allah rakkhe yaar bahut

ziist kā rasta yuuñ to nazar aatā hī hai hamvār bahut

ziist ke sahrā se jab guzre to niklā dushvār bahut

har-sū dār-o-gīr machī hai mujrim kaun hai munsif kaun

daar pe apnoñ kā sar rakh deñ aise yaañ sardār bahut

sab kuchh karnā lekin lāzim ishq se karnā tum parhez

chārāgar kī nasīhatoñ ne mujhe kiyā lāchār bahut

sāmne vo aa.e bhī lekin palak jhapakte guzar ga.e

maiñ ne dil meñ basā rakhe the armān-e-dīdār bahut

merī hī qismat ke taare gardish meñ haiñ kyoñ āḳhir

mere muqaddar hī meñ shāyad taare haiñ dum-dār bahut

nāseh ye kahtā hai tujh ko aatā koī hunar nahīñ

galī galī meñ mai-ḳhānoñ kā merā kārobār bahut

naqsh-e-qadam jo nāqa-e-lailā kā sahrā meñ DhūñD liyā

varna to lailā kā milnā qais ko thā dushvār bahut

sad-hā ham-safaroñ ne chhoḌā is kā mujh ko kyā ġham hai

manzil ko le jaane vaale 'shāhid' mujh ko chaar bahut

KHub KHabar lete hain meri KHair se ye aghyar bahut

dost ko bad-zan karne wale allah rakkhe yar bahut

zist ka rasta yun to nazar aata hi hai hamwar bahut

zist ke sahra se jab guzre to nikla dushwar bahut

har-su dar-o-gir machi hai mujrim kaun hai munsif kaun

dar pe apnon ka sar rakh den aise yan sardar bahut

sab kuchh karna lekin lazim ishq se karna tum parhez

chaaragar ki nasihaton ne mujhe kiya lachaar bahut

samne wo aae bhi lekin palak jhapakte guzar gae

main ne dil mein basa rakhe the arman-e-didar bahut

meri hi qismat ke tare gardish mein hain kyon aaKHir

mere muqaddar hi mein shayad tare hain dum-dar bahut

naseh ye kahta hai tujh ko aata koi hunar nahin

gali gali mein mai-KHanon ka mera karobar bahut

naqsh-e-qadam jo naqa-e-laila ka sahra mein DhunD liya

warna to laila ka milna qais ko tha dushwar bahut

sad-ha ham-safaron ne chhoDa is ka mujh ko kya gham hai

manzil ko le jaane wale 'shahid' mujh ko chaar bahut