KHub-surat lag rahi hai sham tujhko dekh kar

ḳhūb-sūrat lag rahī hai shaam tujh ko dekh kar

chashm-e-dil ko aa gayā ārām tujh ko dekh kar

yuuñ bhī tere shahr meñ rusvā.iyāñ kuchh kam na thiiñ

ho gayā huuñ aur maiñ badnām tujh ko dekh kar

bhuul kar bhī maiñ zabāñ par us ko lā saktā nahīñ

aa gayā hai yaad jo ik kaam tujh ko dekh kar

sar pe mere haath rakh kar khā rahā hai tū qasam

jhuuT meñ paidā huā ib.hām tujh ko dekh kar

qatl to terī nigāhoñ se hue haiñ shahr meñ

le rahe haiñ apne sar ilzām tujh ko dekh kar

kyā karūñgā dekh kar 'bebāk' 'ālam sub.h kā

jaane kyā ho raat kā anjām tujh ko dekh kar

KHub-surat lag rahi hai sham tujh ko dekh kar

chashm-e-dil ko aa gaya aaram tujh ko dekh kar

yun bhi tere shahr mein ruswaiyan kuchh kam na thin

ho gaya hun aur main badnam tujh ko dekh kar

bhul kar bhi main zaban par us ko la sakta nahin

aa gaya hai yaad jo ek kaam tujh ko dekh kar

sar pe mere hath rakh kar kha raha hai tu qasam

jhuT mein paida hua ibham tujh ko dekh kar

qatl to teri nigahon se hue hain shahr mein

le rahe hain apne sar ilzam tujh ko dekh kar

kya karunga dekh kar 'bebak' 'alam subh ka

jaane kya ho raat ka anjam tujh ko dekh kar