KHugar-e-jaur pe thoDi si jafa aur sahi

ḳhūgar-e-jaur pe thoḌī sī jafā aur sahī

is qadar zulm pe mauqūf hai kyā aur sahī

ḳhauf ġhammāz adālat kā ḳhatar daar kā Dar

haiñ jahāñ itne vahāñ ḳhauf-e-ḳhudā aur sahī

ahd-e-avval ko bhī achchhā hai jo puurā kar do

tum vafādār ho thoḌī sī vafā aur sahī

jis ne hañgāma adālat kā tirī dekhā hai

us gunahgār ko ik roz-e-jazā aur sahī

kishvar-e-kufr meñ kaabe ko bhī shāmil kar lo

sair-e-zulmāt ko thoḌī sī fazā aur sahī

bandagī meñ tirī sahte hī haiñ lū kī lapTeñ

chand din ke liye dozaḳh kī havā aur sahī

diin o dil jā hī chukā jaan bhī jaatī hai to jaa.e

tarkash-e-kufr meñ ik tīr-e-qazā aur sahī

rabb-e-izzat ke liye bhī koī rahne do ḳhitāb

tum ḳhudāvand hī kahlāo ḳhudā aur sahī

hukm-e-hākim na sahī marg-e-mufājāt se kam

mālik-ul-mulk pe īmāñ kī sazā aur sahī

ham vafā-keshoñ kā īmāñ bhī hai parvāna-sifat

sham-e-mahfil jo vo kāfir na rahā aur sahī

KHugar-e-jaur pe thoDi si jafa aur sahi

is qadar zulm pe mauquf hai kya aur sahi

KHauf ghammaz adalat ka KHatar dar ka Dar

hain jahan itne wahan KHauf-e-KHuda aur sahi

ahd-e-awwal ko bhi achchha hai jo pura kar do

tum wafadar ho thoDi si wafa aur sahi

jis ne hangama adalat ka teri dekha hai

us gunahgar ko ek roz-e-jaza aur sahi

kishwar-e-kufr mein kabe ko bhi shamil kar lo

sair-e-zulmat ko thoDi si faza aur sahi

bandagi mein teri sahte hi hain lu ki lapTen

chand din ke liye dozaKH ki hawa aur sahi

din o dil ja hi chuka jaan bhi jati hai to jae

tarkash-e-kufr mein ek tir-e-qaza aur sahi

rabb-e-izzat ke liye bhi koi rahne do KHitab

tum KHudawand hi kahlao KHuda aur sahi

hukm-e-hakim na sahi marg-e-mufajat se kam

malik-ul-mulk pe iman ki saza aur sahi

hum wafa-keshon ka iman bhi hai parwana-sifat

sham-e-mahfil jo wo kafir na raha aur sahi