KHun-e-dil pine ka qissa aur gham khane ka nam

ḳhūn-e-dil piine kā qissa aur ġham khāne kā naam

ishq hai ai dost mar mar ke jiye jaane kā naam

yaad aa jaate haiñ un ko soḳhta-sāmān-e-ġham

jab koī letā hai is mahfil meñ parvāne kā naam

zarf-e-ālī chāhiye sahbā-parastī ke liye

kar diyā bad-nām kam-zarfoñ ne maiḳhāne kā naam

gardish-e-daurāñ ke māthe kī miTātā huuñ shikan

sāmne mere na lo zulfoñ ke bal khāne kā naam

lutf par maa.il hai shāyad phir vo chashm-e-mai-farosh

baar baar aatā hai lab par aaj paimāne kā naam

anjuman meñ mah-jamāloñ kī bhalā kyoñ jā.iye

jalva-gāh-e-nāz hai dil ke parī-ḳhāne kā naam

shukriya barq-e-tapāñ tere karam kā shukriyā

tū ne raushan kar diyā hai mere kāshāne kā naam

ishq bhī hai sarmadī terā ai husn-e-lā-zavāl

kis tarah miT jā.egā phir tere dīvāne kā naam

ghuum jaatī hai nazar meñ ik bahisht-e-kaif-o-rang

jhuum jaatā hai mirā dil sun ke maiḳhāne kā naam

shikva-e-bedād bhī kitnā sitam-ījād hai

muskurā dete haiñ vo sun kar sitam Dhāne kā naam

saaf zāhir ho gayā 'nāsir' nigāh-e-shauq se

e'tirāf-e-dilbarī hai un ke sharmāne kā naam

KHun-e-dil pine ka qissa aur gham khane ka nam

ishq hai ai dost mar mar ke jiye jaane ka nam

yaad aa jate hain un ko soKHta-saman-e-gham

jab koi leta hai is mahfil mein parwane ka nam

zarf-e-ali chahiye sahba-parasti ke liye

kar diya bad-nam kam-zarfon ne maiKHane ka nam

gardish-e-dauran ke mathe ki miTata hun shikan

samne mere na lo zulfon ke bal khane ka nam

lutf par mail hai shayad phir wo chashm-e-mai-farosh

bar bar aata hai lab par aaj paimane ka nam

anjuman mein mah-jamalon ki bhala kyon jaiye

jalwa-gah-e-naz hai dil ke pari-KHane ka nam

shukriya barq-e-tapan tere karam ka shukriya

tu ne raushan kar diya hai mere kashane ka nam

ishq bhi hai sarmadi tera ai husn-e-la-zawal

kis tarah miT jaega phir tere diwane ka nam

ghum jati hai nazar mein ek bahisht-e-kaif-o-rang

jhum jata hai mera dil sun ke maiKHane ka nam

shikwa-e-bedad bhi kitna sitam-ijad hai

muskura dete hain wo sun kar sitam Dhane ka nam

saf zahir ho gaya 'nasir' nigah-e-shauq se

e'tiraf-e-dilbari hai un ke sharmane ka nam