KHun-e-jigar ko ghazlon mein tum apni Dhaal ke

ḳhūn-e-jigar ko ġhazloñ meñ tum apnī Dhaal ke

kyā she'r kah rahe ho ai 'ātif' kamāl ke

jo ab guzar gayā hai use bhūl-bhāl ke

aao talāsheñ qissa koī ab ke saal ke

ḳhushiyāñ tamām merī hī jholī meñ Daal ke

vo chal diye haiñ husn kā sadqa nikāl ke

dekheñge ham qarīb se mauqa' agar milā

charche bahut sune tire husn-o-jamāl ke

iz.hār kar sake na mohabbat kā apnī ham

lekin rakhe haiñ ḳhat vo purāne sañbhāl ke

aa.egā vaqt dekhnā ek din zarūr ye

do do javāb deñge ham ik ik savāl ke

maiñ sochtā huuñ har ghaḌī 'ātif' yahī savāl

din haiñ mire 'urūj ke yā haiñ zavāl ke

KHun-e-jigar ko ghazlon mein tum apni Dhaal ke

kya she'r kah rahe ho ai 'atif' kamal ke

jo ab guzar gaya hai use bhul-bhaal ke

aao talashen qissa koi ab ke sal ke

KHushiyan tamam meri hi jholi mein Dal ke

wo chal diye hain husn ka sadqa nikal ke

dekhenge hum qarib se mauqa' agar mila

charche bahut sune tere husn-o-jamal ke

izhaar kar sake na mohabbat ka apni hum

lekin rakhe hain KHat wo purane sanbhaal ke

aaega waqt dekhna ek din zarur ye

do do jawab denge hum ek ek sawal ke

main sochta hun har ghaDi 'atif' yahi sawal

din hain mere 'uruj ke ya hain zawal ke