KHun ke chhinTe sar-e-sahn-e-gulistan dekhe

ḳhuun ke chhīñTe sar-e-sahn-e-gulistāñ dekhe

maiñ ne aise bhī ka.ī jashn-e-bahārāñ dekhe

mujh ko har dard-e-masīhā kī ḳhabar hai lekin

kis ko fursat hai mirā hāl-e-pareshāñ dekhe

bebasī maiñ tujhe kis naam se ta.abīr karūñ

āshiyāñ jalte rahe aur nigahbāñ dekhe

aap ne jalte makānoñ kī kahānī hī sunī

merī āñkhoñ ne to jalte hue insāñ dekhe

ḳhud ko tūfān se mahfūz samajhne vaalo

maiñ ne sāhil se bhī uThte hue tūfāñ dekhe

ḳhaak hogā use andāza-e-tūfāñ 'anvar'

rah ke sāhil pe jo maujoñ ko pareshāñ dekhe

KHun ke chhinTe sar-e-sahn-e-gulistan dekhe

main ne aise bhi kai jashn-e-bahaaran dekhe

mujh ko har dard-e-masiha ki KHabar hai lekin

kis ko fursat hai mera haal-e-pareshan dekhe

bebasi main tujhe kis nam se tabir karun

aashiyan jalte rahe aur nigahban dekhe

aap ne jalte makanon ki kahani hi suni

meri aankhon ne to jalte hue insan dekhe

KHud ko tufan se mahfuz samajhne walo

main ne sahil se bhi uThte hue tufan dekhe

KHak hoga use andaza-e-tufan 'anwar'

rah ke sahil pe jo maujon ko pareshan dekhe