KHun mein Dubi hui lashon ki taraf kya dekhun

ḳhuuñ meñ Duubī huī lāshoñ kī taraf kyā dekhūñ

sang-bārī ke Thikānoñ kī taraf kyā dekhūñ

tere kirdār pe markūz haiñ merī nazreñ

maiñ tire ghar ke ḳhazānoñ kī taraf kyā dekhūñ

khīñch laa.ī hai zarūrat sar-e-bāzār mujhe

jeb ḳhālī hai dukānoñ kī taraf kyā dekhūñ

shahr-e-gunjān meñ ābād nahīñ dil koī

iiñT patthar ke makānoñ kī taraf kyā dekhūñ

ġhībateñ karne se behtar hai ki ḳhāmosh rahūñ

kisī dīvār ke kānoñ kī taraf kyā dekhūñ

buuñd ban ban ke sar-e-rāh bikhar jā.eñgī

abr kī ūñchī chaTānoñ kī taraf kyā dekhūñ

ab to har phuul se bārūd kī bū aatī hai

shāḳh ke tiir kamānoñ kī taraf kyā dekhūñ

be-zamīñ hone kā ehsās dilātā hai lahū

be-zamīñ huuñ to kisānoñ kī taraf kyā dekhūñ

lan-tarānī ke sivā kuchh na milegā 'irfān'

gaañv ke ūñche gharānoñ kī taraf kyā dekhūñ

KHun mein Dubi hui lashon ki taraf kya dekhun

sang-bari ke Thikanon ki taraf kya dekhun

tere kirdar pe markuz hain meri nazren

main tere ghar ke KHazanon ki taraf kya dekhun

khinch lai hai zarurat sar-e-bazar mujhe

jeb KHali hai dukanon ki taraf kya dekhun

shahr-e-gunjaan mein aabaad nahin dil koi

inT patthar ke makanon ki taraf kya dekhun

ghibaten karne se behtar hai ki KHamosh rahun

kisi diwar ke kanon ki taraf kya dekhun

bund ban ban ke sar-e-rah bikhar jaengi

abr ki unchi chaTanon ki taraf kya dekhun

ab to har phul se barud ki bu aati hai

shaKH ke tir kamanon ki taraf kya dekhun

be-zamin hone ka ehsas dilata hai lahu

be-zamin hun to kisanon ki taraf kya dekhun

lan-tarani ke siwa kuchh na milega 'irfan'

ganw ke unche gharanon ki taraf kya dekhun