KHun mera jis se hua hai KHanjar-e-ahbab hai

ḳhuuñ mirā jis se huā hai ḳhanjar-e-ahbāb hai

ye haqīqat hai magar lagtā hai jaise ḳhvāb hai

is liye mujh sā numāyāñ ho gayā be-bāl-o-par

jis jagah maiñ huuñ vahāñ har aadmī surḳhāb hai

ham ne dekhā hai ki aksar Duub jaatā hai vahī

jo talāsh-e-gauhar-e-yaktā meñ zer-e-āb hai

ab kisī jañgal meñ jā rahiye ki apne shahr meñ

aadmī hī aadmī ke vāste nāyāb hai

zindagī apnī bil-āḳhir ho ga.ī us par tamām

jo kitāb-e-zindagī kā nā-mukammal baab hai

vo to ye kahiye shikasta ho chukā hai hausla

varna dil ab bhī kisī ke vasl ko betāb hai

KHun mera jis se hua hai KHanjar-e-ahbab hai

ye haqiqat hai magar lagta hai jaise KHwab hai

is liye mujh sa numayan ho gaya be-baal-o-par

jis jagah main hun wahan har aadmi surKHab hai

hum ne dekha hai ki aksar Dub jata hai wahi

jo talash-e-gauhar-e-yakta mein zer-e-ab hai

ab kisi jangal mein ja rahiye ki apne shahr mein

aadmi hi aadmi ke waste nayab hai

zindagi apni bil-aKHir ho gai us par tamam

jo kitab-e-zindagi ka na-mukammal bab hai

wo to ye kahiye shikasta ho chuka hai hausla

warna dil ab bhi kisi ke wasl ko betab hai