KHwab hi mein ruKH-e-pur-nur dikhae koi

ḳhvāb hī meñ ruḳh-e-pur-nūr dikhā.e koī

ġham meñ rāhat kā bhī pahlū nazar aa.e koī

sāmne us ke dil o jaan o jigar maiñ rakh duuñ

haañ magar haath meñ ḳhanjar to uThā.e koī

apne hī ghar meñ milā DhūñD rahe the jis ko

us ke paane ke liye ḳhud hī ko paa.e koī

aa ga.ī kaalī ghaTā jhuum ke mai-ḳhāne par

tauba kahtī hai ki mujh ko bhī pilā.e koī

jab nazar aatā hai vo jān-e-tamannā dil meñ

kis tamannā ko liye tuur pe jaa.e koī

zindagī kyā hai faqat maut kā jām-e-rañgīñ

hast honā hai to hastī ko miTā.e koī

husn hai mahz jafā ishq hai tasvīr-e-vafā

rabt kā kuchh to sabab mujh ko batā.e koī

jazba-e-shauq use khīñch ke lā.egā yahāñ

aa nahīñ saktā to sau baar na aa.e koī

dil meñ yuuñ parda-nashīñ rahne se hāsil kyā hai

lutf to jab hai 'ratan' sāmne aa.e koī

KHwab hi mein ruKH-e-pur-nur dikhae koi

gham mein rahat ka bhi pahlu nazar aae koi

samne us ke dil o jaan o jigar main rakh dun

han magar hath mein KHanjar to uThae koi

apne hi ghar mein mila DhunD rahe the jis ko

us ke pane ke liye KHud hi ko pae koi

aa gai kali ghaTa jhum ke mai-KHane par

tauba kahti hai ki mujh ko bhi pilae koi

jab nazar aata hai wo jaan-e-tamanna dil mein

kis tamanna ko liye tur pe jae koi

zindagi kya hai faqat maut ka jam-e-rangin

hast hona hai to hasti ko miTae koi

husn hai mahz jafa ishq hai taswir-e-wafa

rabt ka kuchh to sabab mujh ko batae koi

jazba-e-shauq use khinch ke laega yahan

aa nahin sakta to sau bar na aae koi

dil mein yun parda-nashin rahne se hasil kya hai

lutf to jab hai 'ratan' samne aae koi