KHwab jine nahin denge tujhe KHwabon se nikal

ḳhvāb jiine nahīñ deñge tujhe ḳhvāboñ se nikal

vaqt barbād na kar rā.egāñ sochoñ se nikal

dasht-e-imkān meñ dariyā bhī hai bādal bhī haiñ

shart bas itnī hai tū apne sarāboñ se nikal

ek be-rañg sī tasvīr banā le ḳhud ko

rañg yaksāñ nahīñ rahte kabhī rañgoñ se nikal

varna tū apne hī andar kahīñ bujh jā.egā

khul ke ab sāmne aa apne añdheroñ se nikal

shab ne sūraj se kahā ye to nahīñ terā maqām

chal bulandī kī tarah lauT nasheboñ se nikal

tire hone kā tujhe bhī to ho ehsās koī

ek koñpal kī tarah apnī hī shāḳhoñ se nikal

ab vo girdāb kī kashtī kī kahānī na sunā

tujh ko sāhil pe pahuñchnā hai to maujoñ se nikal

ik na ik roz samundar kā safar karnā hai

apne ehsās ke mahdūd jazīroñ se nikal

KHwab jine nahin denge tujhe KHwabon se nikal

waqt barbaad na kar raegan sochon se nikal

dasht-e-imkan mein dariya bhi hai baadal bhi hain

shart bas itni hai tu apne sarabon se nikal

ek be-rang si taswir bana le KHud ko

rang yaksan nahin rahte kabhi rangon se nikal

warna tu apne hi andar kahin bujh jaega

khul ke ab samne aa apne andheron se nikal

shab ne suraj se kaha ye to nahin tera maqam

chal bulandi ki tarah lauT nashebon se nikal

tere hone ka tujhe bhi to ho ehsas koi

ek konpal ki tarah apni hi shaKHon se nikal

ab wo girdab ki kashti ki kahani na suna

tujh ko sahil pe pahunchna hai to maujon se nikal

ek na ek roz samundar ka safar karna hai

apne ehsas ke mahdud jaziron se nikal