KHwab kahan se TuTa hai tabir se puchhte hain

ḳhvāb kahāñ se TuuTā hai tābīr se pūchhte haiñ

qaidī sab kuchh bhuul gayā zanjīr se pūchhte haiñ

jām-e-jam laayā hai ghar ghar duniyā ke hālāt

dil kī bāteñ ham terī tasvīr se pūchhte haiñ

duniyā kab karvaT badlegī kab jāgeñge shahr

kaisī bāteñ so.e hue zamīr se pūchhte haiñ

ham se na pūchho kis jazbe ne tumheñ kiyā nākām

bādshāh aisī bāteñ apne vazīr se pūchhte haiñ

ahd se kaun mukar jā.egā tāroñ ko kyā ilm

likkhī nahīñ jo tū ne us tahrīr se pūchhte haiñ

'qāsir' ne to dekhā hai ab tak fāqoñ kā raqs

jauhrī tāqat kyā hai jauhar-e-'mīr' se pūchhte haiñ

KHwab kahan se TuTa hai tabir se puchhte hain

qaidi sab kuchh bhul gaya zanjir se puchhte hain

jam-e-jam laya hai ghar ghar duniya ke haalat

dil ki baaten hum teri taswir se puchhte hain

duniya kab karwaT badlegi kab jagenge shahr

kaisi baaten soe hue zamir se puchhte hain

hum se na puchho kis jazbe ne tumhein kiya nakaam

baadshah aisi baaten apne wazir se puchhte hain

ahd se kaun mukar jaega taron ko kya ilm

likkhi nahin jo tu ne us tahrir se puchhte hain

'qasir' ne to dekha hai ab tak faqon ka raqs

jauhri taqat kya hai jauhar-e-'mir' se puchhte hain