KHwab khulna hai jo aankhon pe wo kab khulta hai

ḳhvāb khulnā hai jo āñkhoñ pe vo kab khultā hai

phir bhī kahiye ki bas ab khultā hai ab khultā hai

bāb-e-ruḳhsat se guzartā huuñ so hotī hai shanāḳht

jis qadar dosh pe sāmān hai sab khultā hai

ye añdherā hai aur aise hī nahīñ khultā ye

der tak raushnī kī jaatī hai tab khultā hai

merī āvāz pe khultā thā jo dar pahle-pahal

maiñ pareshāñ huuñ ki ḳhāmoshī pe ab khultā hai

ik makāñ kī baḌī tashvīsh hai rahgīroñ ko

vo jo barsoñ meñ nahīñ khultā to kab khultā hai

ab khulā hai ki charāġhoñ ko yahāñ rakkhā jaa.e

ye vo ruḳh hai jahāñ darvāza-e-shab khultā hai

us ne khulne kī yahī shart rakhī ho jaise

mujh meñ girheñ sī lagā jaatā hai jab khultā hai

KHwab khulna hai jo aankhon pe wo kab khulta hai

phir bhi kahiye ki bas ab khulta hai ab khulta hai

bab-e-ruKHsat se guzarta hun so hoti hai shanaKHt

jis qadar dosh pe saman hai sab khulta hai

ye andhera hai aur aise hi nahin khulta ye

der tak raushni ki jati hai tab khulta hai

meri aawaz pe khulta tha jo dar pahle-pahal

main pareshan hun ki KHamoshi pe ab khulta hai

ek makan ki baDi tashwish hai rahgiron ko

wo jo barson mein nahin khulta to kab khulta hai

ab khula hai ki charaghon ko yahan rakkha jae

ye wo ruKH hai jahan darwaza-e-shab khulta hai

us ne khulne ki yahi shart rakhi ho jaise

mujh mein girhen si laga jata hai jab khulta hai