KHwab ki khiDki se usko dekhna achchha laga

ḳhvāb kī khiḌkī se us ko dekhnā achchhā lagā

niiñd ke āñgan meñ shab-bhar jāgnā achchhā lagā

shahr-e-nā-pursāñ thā yuuñ bhī kaun kis ko pūchhtā

ek pal ko us kā muḌ kar dekhnā achchhā lagā

saath thā sahrā meñ bhī vo har-qadam sāya-sifat

is tarah shahr-e-ḳhirad se lauTnā achchhā lagā

ban gayā ik khel sā auroñ meñ ḳhud ko DhūñDhnā

kūcha kūcha qarya qarya ghūmnā achchhā lagā

ḳhvāb kaisā thā ki saarī umr āñkhoñ meñ rahā

dhyān kis kā thā ki pahroñ sochnā achchhā lagā

chāñdnī rātoñ meñ aksar jaag kar sochā jise

us kā raste meñ achānak sāmnā achchhā lagā

fasl-e-gul aa.ī to kyā kyā sūrateñ bāham huiiñ

chehra chehra ek sūrat DhūñDhnā achchhā lagā

kahkashāñ kī kahkashāñ merī galī meñ aa ga.ī

kaisī aahaT thī ki khiḌkī kholnā achchhā lagā

jaane kyā khoyā ki ab tak DhūñDte phirte haiñ ham

jaane kyā paayā ki sab kuchh bhūlnā achchhā lagā

KHwab ki khiDki se us ko dekhna achchha laga

nind ke aangan mein shab-bhar jagna achchha laga

shahr-e-na-pursan tha yun bhi kaun kis ko puchhta

ek pal ko us ka muD kar dekhna achchha laga

sath tha sahra mein bhi wo har-qadam saya-sifat

is tarah shahr-e-KHirad se lauTna achchha laga

ban gaya ek khel sa auron mein KHud ko DhunDhna

kucha kucha qarya qarya ghumna achchha laga

KHwab kaisa tha ki sari umr aankhon mein raha

dhyan kis ka tha ki pahron sochna achchha laga

chandni raaton mein aksar jag kar socha jise

us ka raste mein achanak samna achchha laga

fasl-e-gul aai to kya kya suraten baham huin

chehra chehra ek surat DhunDhna achchha laga

kahkashan ki kahkashan meri gali mein aa gai

kaisi aahaT thi ki khiDki kholna achchha laga

jaane kya khoya ki ab tak DhunDte phirte hain hum

jaane kya paya ki sab kuchh bhulna achchha laga