KHwab ko nind ki sarhad pe rakha jata hai

ḳhvāb ko niiñd kī sarhad pe rakhā jaatā hai

tab kahīñ jā ke tirā vasl bunā jaatā hai

dil utar jaatā hai nazroñ se sar-e-shām kahīñ

phir udāsī ko ḳhayāloñ meñ bharā jaatā hai

canvas dard se ho jaatā hai chhalnī-chhalnī

jab tire hijr ko tasvīr kiyā jaatā hai

ek vīrānī sī ug paḌtī hai mere andar

ek lā-shakl ko imkān diyā jaatā hai

muttasil hogā bhalā kaise tire dukh se ḳhalā

kab kisī karb ko vahshat se siyā jaatā hai

log ā.eñge duā lene lahad par 'hāris'

maiñ batā jā.ūñgā yuuñ ishq kiyā jaatā hai

KHwab ko nind ki sarhad pe rakha jata hai

tab kahin ja ke tera wasl buna jata hai

dil utar jata hai nazron se sar-e-sham kahin

phir udasi ko KHayalon mein bhara jata hai

canwas dard se ho jata hai chhalni-chhalni

jab tere hijr ko taswir kiya jata hai

ek virani si ug paDti hai mere andar

ek la-shakl ko imkan diya jata hai

muttasil hoga bhala kaise tere dukh se KHala

kab kisi karb ko wahshat se siya jata hai

log aaenge dua lene lahad par 'haaris'

main bata jaunga yun ishq kiya jata hai