KHwab mein aaya nazar misr ka bazar mujhe

ḳhvāb meñ aaya nazar misr kā bāzār mujhe

is kī ta.abīr to de ai nigah-e-yār mujhe

baḳhsh kar roz-e-azal dīda-e-bedār mujhe

tū ne duniyā kā kiyā mālik-o-muḳhtār mujhe

lutf ye hai ki malā.ik ke liye sirf sujūd

aur taḳhlīq kī har manzil-e-dushvār mujhe

kajravī ban ga.ī zanjīr mire paañv kī

tū ne kyuuñ kī thī atā vaqt kī raftār mujhe

pursish-e-ġham se aziyyat meñ izāfa to na ho

haal pe mere agar chhoḌ deñ ġham-ḳhvār mujhe

dil-e-ġham-dīda-e-anjām laraz jaatā hai

jab sar-e-bazm vo kahte haiñ vafādār mujhe

mujh meñ hai tāb-e-nazar maiñ to na hotā behosh

tū agar aatā nazar tuur pe sau baar mujhe

KHwab mein aaya nazar misr ka bazar mujhe

is ki tabir to de ai nigah-e-yar mujhe

baKHsh kar roz-e-azal dida-e-bedar mujhe

tu ne duniya ka kiya malik-o-muKHtar mujhe

lutf ye hai ki malaik ke liye sirf sujud

aur taKHliq ki har manzil-e-dushwar mujhe

kajrawi ban gai zanjir mere panw ki

tu ne kyun ki thi ata waqt ki raftar mujhe

pursish-e-gham se aziyyat mein izafa to na ho

haal pe mere agar chhoD den gham-KHwar mujhe

dil-e-gham-dida-e-anjam laraz jata hai

jab sar-e-bazm wo kahte hain wafadar mujhe

mujh mein hai tab-e-nazar main to na hota behosh

tu agar aata nazar tur pe sau bar mujhe