KHwab rakhe hain tariki par dard rakha hai raaton par

ḳhvāb rakhe haiñ tārīkī par dard rakhā hai rātoñ par

aag lagā.ī hai ashkoñ ne tohmat hai angāroñ par

sūraj chāhe aa.e na aa.e haal pūchhne bastī kā

sab ne ummīdeñ rakh dī haiñ ab be-nūr charāġhoñ par

din to din hai rāteñ bhī ab sargoshī sī kartī haiñ

haath rakhā thā bhūle se ik baar kisī ne palkoñ par

mumkin nahīñ ki saañs le dhartī aur havā na ho bedār

lamhoñ ke sab naqsh rakhe jaate haiñ phailī sadiyoñ par

is din se logoñ ne ham se milnā-julnā tark kiyā

apnī gahrā.ī rakh dī hai jab se ham ne sat.hoñ par

bhūlī-bisrī yādoñ ne jis din se shabnam Tapkā.ī

koī titlī nahīñ baiThtī aakar in gul-dānoñ par

is ko bhūle us se bichhḌe ek zamāna biit gayā

koī bhārī bojh rakhā hai ab bhī merī sāñsoñ par

ik āñdhī ne reza reza kar ke mujh ko chhoḌ diyā

magar salāmat sā lagtā huuñ ab bhī apne zarroñ par

apnā sab kuchh chhoḌ ke aa.e kahāñ bayābāñ meñ 'parvāz'

bure vaqt meñ kaun taras khātā hai ġham ke māroñ par

KHwab rakhe hain tariki par dard rakha hai raaton par

aag lagai hai ashkon ne tohmat hai angaron par

suraj chahe aae na aae haal puchhne basti ka

sab ne ummiden rakh di hain ab be-nur charaghon par

din to din hai raaten bhi ab sargoshi si karti hain

hath rakha tha bhule se ek bar kisi ne palkon par

mumkin nahin ki sans le dharti aur hawa na ho bedar

lamhon ke sab naqsh rakhe jate hain phaili sadiyon par

is din se logon ne hum se milna-julna tark kiya

apni gahrai rakh di hai jab se hum ne sathon par

bhuli-bisri yaadon ne jis din se shabnam Tapkai

koi titli nahin baiThti aakar in gul-danon par

is ko bhule us se bichhDe ek zamana bit gaya

koi bhaari bojh rakha hai ab bhi meri sanson par

ek aandhi ne reza reza kar ke mujh ko chhoD diya

magar salamat sa lagta hun ab bhi apne zarron par

apna sab kuchh chhoD ke aae kahan bayaban mein 'parwaz'

bure waqt mein kaun taras khata hai gham ke maron par