KHwab sunne se gae ishq batane se gae

ḳhvāb sunñe se ga.e ishq batāne se ga.e

zindagī ham tirī tauqīr baḌhāne se ga.e

ghar ke āñgan meñ lagā peḌ kaTā hai jab se

ham tirī baat parindoñ ko sunāne se ga.e

juz tujhe dekhne ke aur nahīñ thā koī kaam

ye alag baat kisī aur bahāne se ga.e

jab se vahshat ne na.ī shakl nikālī apnī

ham junūñ-zād kisī dasht meñ jaane se ga.e

vaqt par us ne pahuñchne kā kahlvāyā thā

ham hī tāḳhīr se pahuñche so Thikāne se ga.e

āsmāñ roz mire ḳhvāb meñ aa jaatā hai

ham ḳhayāloñ meñ hasīñ chāñd banāne se ga.e

dil kī tanhā.ī meñ vahshat kī darāḌeñ haiñ 'sa.īd'

ham darāḌoñ meñ tirā hijr basāne se ga.e

KHwab sunne se gae ishq batane se gae

zindagi hum teri tauqir baDhane se gae

ghar ke aangan mein laga peD kaTa hai jab se

hum teri baat parindon ko sunane se gae

juz tujhe dekhne ke aur nahin tha koi kaam

ye alag baat kisi aur bahane se gae

jab se wahshat ne nai shakl nikali apni

hum junun-zad kisi dasht mein jaane se gae

waqt par us ne pahunchne ka kahlwaya tha

hum hi taKHir se pahunche so Thikane se gae

aasman roz mere KHwab mein aa jata hai

hum KHayalon mein hasin chand banane se gae

dil ki tanhai mein wahshat ki daraDen hain 'said'

hum daraDon mein tera hijr basane se gae