KHwabon ke kisi moD pe dekha sa lage hai

ḳhvāboñ ke kisī moḌ pe dekhā sā lage hai

apnā na sahī phir bhī vo apnā sā lage hai

ai shiddat-e-girya kahīñ dil Duub na jaa.e

ye dard kā lamha mujhe dariyā sā lage hai

jis moḌ pe bichhḌe the hamesha ke liye ham

dil hai ki usī moḌ pe Thahrā sā lage hai

āñkhoñ meñ basī hai koī khoī huī ḳhushbū

jis phuul ko dekho vahī chehrā sā lage hai

barsoñ se kisī ke liye ro.e bhī nahīñ ham

kyoñ zaḳhm-e-tamannā hai ki taaza sā lage hai

tum Dūbte sūraj ke liye ro.o ho 'qaisar'

kuchh der meñ saaya bhī bichhaḌtā sā lage hai

KHwabon ke kisi moD pe dekha sa lage hai

apna na sahi phir bhi wo apna sa lage hai

ai shiddat-e-girya kahin dil Dub na jae

ye dard ka lamha mujhe dariya sa lage hai

jis moD pe bichhDe the hamesha ke liye hum

dil hai ki usi moD pe Thahra sa lage hai

aankhon mein basi hai koi khoi hui KHushbu

jis phul ko dekho wahi chehra sa lage hai

barson se kisi ke liye roe bhi nahin hum

kyon zaKHm-e-tamanna hai ki taza sa lage hai

tum Dubte suraj ke liye roo ho 'qaisar'

kuchh der mein saya bhi bichhaDta sa lage hai