KHwabon ki chandni ka sarapa kahan se aae

ḳhvāboñ kī chāñdnī kā sarāpā kahāñ se aa.e

jab jism hī nahīñ hai to saayā kahāñ se aa.e

hoñToñ ko sī liyā hai to naġhmoñ kā zikr kyā

paanī bañdhā huā hai to dhārā kahāñ se aa.e

sūraj to shash-jihat se dikhātā hai aa.ina

dīvār mil bhī jaa.e to saayā kahāñ se aa.e

ye raat ye thakan ye udāsī ye tīrgī

aise meñ koī chāñd kā TukḌā kahāñ se aa.e

ehsās to mujhe bhī hai sūraj kī pyaas kā

jab ḳhuun hī nahīñ to pasīnā kahāñ se aa.e

'tāhir' ye rahzanoñ kā luTeroñ kā shahr hai

tum is añdherī raat meñ tanhā kahāñ se aa.e

KHwabon ki chandni ka sarapa kahan se aae

jab jism hi nahin hai to saya kahan se aae

honTon ko si liya hai to naghmon ka zikr kya

pani bandha hua hai to dhaara kahan se aae

suraj to shash-jihat se dikhata hai aaina

diwar mil bhi jae to saya kahan se aae

ye raat ye thakan ye udasi ye tirgi

aise mein koi chand ka TukDa kahan se aae

ehsas to mujhe bhi hai suraj ki pyas ka

jab KHun hi nahin to pasina kahan se aae

'tahir' ye rahzanon ka luTeron ka shahr hai

tum is andheri raat mein tanha kahan se aae