KHwabon ki kaenat mein khone nahin diya

ḳhvāboñ kī kā.enāt meñ khone nahīñ diyā

tere ḳhayāl ne mujhe sone nahīñ diyā

gardish meñ rakkhā terī kashish ne mujhe sadā

ab tak kisī Thikāne kā hone nahīñ diyā

har ma.arke se ziist ke niklā huuñ surḳh-rū

bas ye ki dil meñ ḳhauf samone nahīñ diyā

zaḳhmoñ se thā niDhāl magar mauj-e-vaqt ko

chāhat kā naqsh siine se dhone nahīñ diyā

ik hādse kī yaad ne dil kī zamīn meñ

ḳhvāhish kā tuḳhm phir kabhī bone nahīñ diyā

'kāshif' kamāl-e-zabt ne rakkhā mirā bharam

zālim ke sāmne mujhe rone nahīñ diyā

KHwabon ki kaenat mein khone nahin diya

tere KHayal ne mujhe sone nahin diya

gardish mein rakkha teri kashish ne mujhe sada

ab tak kisi Thikane ka hone nahin diya

har marke se zist ke nikla hun surKH-ru

bas ye ki dil mein KHauf samone nahin diya

zaKHmon se tha niDhaal magar mauj-e-waqt ko

chahat ka naqsh sine se dhone nahin diya

ek hadse ki yaad ne dil ki zamin mein

KHwahish ka tuKHm phir kabhi bone nahin diya

'kashif' kamal-e-zabt ne rakkha mera bharam

zalim ke samne mujhe rone nahin diya